၂၀၁၉ခုနှစ်တွင် ပြောင်းလဲအသုံးပြုမည့် တက္ကသိုလ်ဝင်စာမေးပွဲအင်္ဂလိပ်စာဘာသာရပ် မေးခွန်းပုံစံသစ်နှင့် ပတ်သက်သည့် ရှင်းလင်းတင်ပြချက်
Date : 3 May, 2018
Ref>>
http://www.moe-st.gov.mm/?p=5602
၂၀၁၉ခုနှစ် တက္ကသိုလ်ဝင် စာမေးပွဲအင်္ဂလိပ်စာဘာသာရပ် မေးခွန်းကိုကျောင်းသား၊ ကျောင်းသူများ ပြဌာန်းစာအုပ်ကို အလွတ်ကျက်မှတ် ဖြေဆိုမှု လျော့နည်းစေပြီး၊ ကျောင်းသား၊ ကျောင်းသူများ၏ စဉ်းစားတွေးခေါ်မှုနှင့် ဆက်သွယ်ရေးသား နိုင်မှုများ ပိုမိုဖွံ့ဖြိုး တိုးတက်လာ စေရန်နှင့် ၎င်းတို့၏ အမှန်တကယ် တတ်ကျွမ်းမှုကို စစ်ဆေးသော မေးခွန်းများ ဖြစ်စေရန် ရည်ရွယ်၍ ပြောင်းလဲခြင်း ဖြစ်ပါသည်။
ပြဌာန်းစာအုပ်နှင့် သင်ခန်းစာ (၁၄)ခုကိုပြောင်းလဲမည်မဟုတ်ပါ။ မေးခွန်းအားလုံးကိုလည်း ပြောင်းလဲမည် မဟုတ်ပါ။ သင်ကြားမည့် ဆရာ၊ဆရာမများနှင့် ကျောင်းသား၊ ကျောင်းသူတို့အတွက် အခက်အခဲ မဖြစ်စေပဲ ကျောင်းသား၊ ကျောင်းသူတို့၏ စဉ်းစားတွေးခေါ် နိုင်သည့် စွမ်းရည်များ ပိုမိုဖွံ့ဖြိုးတိုးတက်စေမည့် အကျိုးကျေးဇူးကို ရှေ့ရှု၍ မေးခွန်းအချို့ကို မွမ်းမံပြင်ဆင်၊ ဖြည့်စွက် ခြင်းသာ ဖြစ်ပါသည်။ မေးခွန်းအများစုသည် ဒသမတန်း အင်္ဂလိပ်စာ ဖတ်စာအုပ်တွင် ပါရှိသော သင်ခန်းစာ (၁၄)ခုကို အခြေခံ၍ မေးမည်ဖြစ်ပြီး ကျောင်းသားအများစု ဖြေဆိုနိုင်မည့် လွယ်၊ သင့်၊ ခက် မေးခွန်းများ ပါဝင်မည် ဖြစ်သဖြင့် သင်ခန်းစာများကို ကျေညက်စွာ လေ့လာထားသော ကျောင်းသား၊ ကျောင်းသူအများစု ဖြေဆိုနိုင်မည့် မေးခွန်းပုံစံဖြစ်ပါသည်။
လက်ရှိမေးခွန်းပုံစံတွင် မေးခွန်း(၉)ပုဒ်ပါရှိသကဲ့သို့ ပြောင်းလဲအသုံးပြုမည့် မေးခွန်းပုံစံတွင်လည်း မေးခွန်း (၉)ပုဒ် ပါရှိမည် ဖြစ်ပါသည်။ မေးခွန်းတစ်ပုဒ်စီ အတွက် ပေးထားသော အမှတ်များကိုလည်း ပြောင်းလဲမည်မဟုတ်ပါ။
မေးခွန်းနံပါတ်(၁)ပုံစံကို ပြောင်းလဲမည်မဟုတ်ပါ။
မေးခွန်းနံပါတ်(၂)ကပြောင်းလဲမည်မဟုတ်ပါ။ သို့သော် ဖတ်စာအုပ်ပါ စာပိုဒ်တွင်ပါရှိသည့် ကွက်လပ်ဖြည့်ရာတွင် အသုံးပြုရမည့် စကားလုံး(၂၀)လုံး အစား စကားလုံး(၂၅)လုံး ပေးထားပါမည်။ စကားလုံးအရေအတွက် ပိုပေးထားသဖြင့် ယခင်ကထက် ပိုမိုစဉ်းစားပြီးမှ မှန်ကန်သော စကားလုံးများကို ရွေးချယ်နိုင်မည်ဖြစ်ပါသည်။
မေးခွန်းနံပါတ်(၃)တွင် ပြောင်းလဲမှုရှိပါသည်။ ယခင်ကပြဌာန်းစာအုပ်တွင် ပါရှိသော အကြောင်းအရာကို မေးသည့် မေးခွန်း(၅)ခုနှင့် ကဗျာများမှ မေးခွန်း(၅)ခုပါသည့် ကွက်လပ်ဖြည့် မေးခွန်း(၁၀)ခု မေးပါသည်။ ယခုမေးခွန်းတွင် မေးခွန်းနံပါတ် (၃)(က)နှင့် ၃(ခ) ဟုခွဲ၍မေးပါမည်။ မေးခွန်းနံပါတ်(၃)(က)တွင်မေးခွန်း(၅)ပုဒ် မေးပါမည်။ ပြဌာန်းစာအုပ်တွင် ပါသော စကားလုံးများကို မှန်ကန်စွာ သုံးတတ်မှုကို စစ်ဆေးရန် မေးခွန်းတစ်ပုဒ်စီတွင် ပြဌာန်းစာအုပ်မှ မဟုတ်သော ဝါကျတစ်ကြောင်းနှင့် ရွေးချယ်ရန် စကားလုံး(၃)လုံးကို ပေး၍ မှန်ကန်သော စကားလုံးကို ရွေးချယ်စေပါမည်။ အလွတ်ကျက်မှတ်မှု လျော့နည်းစေရန်နှင့် ဖတ်စာအုပ်ထဲရှိသော Vocabulary Section နှင့် စာပိုဒ်များရှိ စကားလုံးများကို နားလည်ပြီး ပြန်လည် အသုံးပြုတတ်စေရန် ဖြစ်ပါသည်။ မေးခွန်းနံပါတ်(၃)(ခ)တွင် ယခင်မေးခွန်းတွင် မေးသကဲ့သို့ ကဗျာစာကြောင်းများကို ကွက်လပ်ဖြည့် သည့် မေးခွန်း(၅)ပုဒ် မေးပါမည်။
မေးခွန်းနံပါတ်(၄)တွင် ပြောင်းလဲမှု အနည်းငယ်ရှိပါသည်။ မေးခွန်းအရေ အတွက်(၅)ပုဒ်မှာ ပြောင်းလဲမှုမရှိပါ။ ယခင် မေးခွန်းများတွင် ကဲ့သို့ နံပါတ်(၁)နှင့် (၂)တွင် ရွေးချယ်ရန် ပေးမထားပါ။နံပါတ်(၃)နှင့် (၄)တွင်လည်းWho said these words and to whom were they said? What does the underlined word refer to? From which unit are the following lines taken? စသည့် တသမတ်တည်းမေးသည့် မေးခွန်းပုံစံမျိုးမေးမည် မဟုတ်ပါ။ ကျောင်းသား၊ ကျောင်းသူများ သင်ခန်းစာများကို ကျယ်ကျယ်ပြန့်ပြန့် လေ့လာပြီး မေးခွန်းအမျိုးမျိုးကို ဖြေဆိုတတ်စေရန် မေးခွန်း(၄)ခု မေးမည်ဖြစ်ပါသည်။ နံပါတ်(၅)တွင် ယခင်အတိုင်း ကဗျာဆိုလိုရင်းကို မေးမည်ဖြစ်ပါသည်။
မေးခွန်းနံပါတ်(၅)တွင် ဖတ်စာအုပ်ထဲမှ မဟုတ်သော တက္ကသိုလ်ဝင်စာမေးပွဲဖြေဆိုမည့် ကျောင်းသား၊ ကျောင်းသူတို့၏ အဆင့်နှင့် ကိုက်ညီသော စာပိုဒ်တစ်ပိုဒ်(Unseen passage) ကိုပေးထားပြီး မေးခွန်း(၅)ခု ဖြေဆိုစေပါမည်။ ကျောင်းသား၊ကျောင်းသူတို့၏ စာဖတ်ပြီး နားလည်နိုင်စွမ်းကို အမှန်တကယ် စစ်ဆေးသည့် မေးခွန်းများဖြစ်ပါမည်။
မေးခွန်းနံပါတ်(၆)ပုံစံကိုပြောင်းလဲမည်မဟုတ်ပါ။
မေးခွန်းနံပါတ်(၇)(က)နှင့် (၇)(ခ) ပုံစံကိုပြောင်းလဲမည်မဟုတ်ပါ။
မေးခွန်းနံပါတ်(၈)ပုံစံကိုပြောင်းလဲမည်မဟုတ်ပါ။ သို့သော် ကျောင်းသား၊ ကျောင်းသူများ ပေးစာရေးသူနှင့် လက်ခံသူတို့ကို ရောထွေးမှုမရှိစေရန် ပေးစာ (၃)ပုဒ်အစားပေးစာ (၂)ပုဒ်ပေးထားပြီး မိမိနှစ်သက်ရာ တစ်ပုဒ်ကို ရေးသားရပါမည်။ စာလုံးရေ (၃၀၀)ထက် ပိုမရေးရန် ကန့်သတ်ထားပါမည်။ သို့သော် စာလုံးရေ အတိအကျ ရေးရန်မလိုပါ။ ကျောင်းသား၊ ကျောင်းသူများ မေးခွန်းနှင့် ဆီလျော်သော အကြောင်းအရာများကို လိုရင်းတိုရှင်း ကျစ်လစ်တိကျစွာ ကိုယ်ပိုင် အတွေးအခေါ်ဖြင့် ရေးသားနိုင်စေရန် ဖြစ်ပါသည်။
မေးခွန်းနံပါတ်(၉)ပုံစံကို ပြောင်းလဲမည်မဟုတ်ပါ။ ယခင် မေးခွန်းများအတိုင်း စာစီစာကုံးခေါင်းစဉ် (၃)ခု ပေးထားမည်ဖြစ်ပြီး ကျောင်းသား၊ ကျောင်းသူတို့က မိမိတို့ ကြိုက်နှစ်သက်သည့် ခေါင်းစဉ် တစ်ခုရွေး၍ စာစီစာကုံး ရေးသားရပါမည်။ စာလုံးရေ (၅၀၀)ထက် ပိုမရေးရန် ကန့်သတ်ထားပါမည်။ သို့သော် စာလုံးရေ အတိမကျရေးရန်မလိုပါ။ ကျောင်းသား၊ ကျောင်းသူများ ပေးထားသော ခေါင်းစဉ်နှင့် ကိုက်ညီသော အကြာင်းအရာများကို ကျစ်ကျစ်လစ်လစ် ထိထိမိမိရေးသား တတ်စေရန်နှင့် အလွတ်ကျက်မှတ်ပြီး မဆီလျော်သော အကြောင်းအရာများ ထည့်သွင်းရေးသားမှုကို လျော့နည်းစေရန် စာလုံးရေကန့်သတ်ခြင်းဖြစ်ပါသည်။
မေးခွန်းနံပါတ်(၈)နှင့်(၉)သည် ကျောင်းသား၊ ကျောင်းသူတို့၏ စိတ်ကူးစိတ်သန်းဖြင့် တွေးခေါ်နိုင်မှု၊ တီထွင်ဖန်တီးနိုင်မှု၊ စဉ်းစားဝေဖန်နိုင်မှု၊ ဆုံးဖြတ်နိုင်မှုနှင့် မိမိတို့အမြင်ကို ထုတ်ဖော်ရေးသား နိုင်မှုတို့ကို အမှန်တကယ် စစ်ဆေးသော မေးခွန်းမျိုးဖြစ်ပါမည်။
ယခုပြောင်းလဲမည့် မေးခွန်းပုံစံကိုခြုံ၍ ကြည့်မည်ဆိုပါကကျောင်းသား၊ ကျောင်းသူတို့၏ အလွတ် ကျက်မှတ်မှုကို အားပေးသော မေးခွန်းပုံစံအစား၊ ၎င်းတို့၏ စဉ်းစားဆင်ခြင် တွေးခေါ်နိုင်မှုနှင့် ကိုယ်ပိုင် အတွေးအခေါ်၊ အယူအဆများကို တင်ပြနိုင်မှုကို ဦးစားပေးသော မေးခွန်းပုံစံဖြစ်စေရန် ပြောင်းလဲခြင်းသာ ဖြစ်ပါသည်။ အင်္ဂလိပ်စာတတ်ကျွမ်းမှုကို အမှန်တကယ် စစ်ဆေးသည့် မေးခွန်းပုံစံသို့ မေးခွန်းအားလုံးကို တစ်ပြိုင်နက်တည်း ပြောင်းလဲရန် ဆရာ၊ ဆရာမများနှင့် ကျောင်းသား၊ ကျောင်းသူများ အဆင်သင့် မဖြစ်သေးသဖြင့် ၎င်းတို့အတွက် ဝန်ထုပ်ဝန်ပိုးမဖြစ်စေရန် ဤမေးခွန်းပုံစံကို ပြောင်းလဲခြင်း ဖြစ်ပါသည်။ အမှတ်ပေးစည်းမျဉ်းများကိုလည်း ကျောင်းသား၊ ကျောင်းသူတို့၏ ဖြေဆိုချက်များ ဆီလျော်မှုရှိ၊ မရှိကို ဦးစားပေး စစ်ဆေးသော စည်းမျဉ်းများအဖြစ် တဖြည်းဖြည်းချင်း ပြောင်းလဲမည်ဖြစ်ပါသည်။ ထို့သို့ ပြောင်းလဲခြင်းဖြင့် ၂၀၂၃ခုနှစ်တွင် ပြဌာန်းစာအုပ်အသစ်ကို စတင်အသုံးပြုသည့် အချိန်၌ ကျောင်းသား၊ ကျောင်းသူတို့၏ စဉ်းစားတွေးခေါ်နိုင်မှု၊ တီထွင်ကြံဆနိုင်မှုနှင့် ကျွမ်းကျင်စွာ ရေးသားပြောဆိုနိုင်မှုတို့ကို အပြည့်အဝ စစ်ဆေးသော မေးခွန်းများဖြစ်လာမည် ဖြစ်ပါသည်။
(နမူနာမေးခွန်းတည်ဆောက်ပုံ)
2019
MATRICULATION EXAMINATION
DEPARTMENT OF MYANMAR EXAMINATION
ENGLISH Time Allowed: (3) Hours
WRITE YOUR ANSWERS IN THE ANSWER BOOKLET.
ANSWER ALL QUESTIONS.
Read the passage.
ပြဌာန်းစာအုပ်တွင် ပါရှိသောသင်ခန်းစာ (၁၄)ခုထဲမှစာပိုဒ် တစ်ပိုဒ်ပေးထားပါမည်။
(A) Write the correct word or words to complete each sentence. (5 marks)
ဝါကျ (၁)ခုစီတွင် ကွက်လပ်(၁)ခုစီပါသောဝါကျ (၅)ကြောင်းပေးထားပြီးကွက်လပ်များကိုစာပိုဒ်ပါ အချက်အလက်များဖြင့် မှန်ကန်စွာဖြည့်ပေးရပါမည်။
(B) Answer each question in one sentence. (5 marks)
စာပိုဒ်ပေါ် အခြေခံသောမေးခွန်း(၅)ခုမေးထားပြီးတစ်ခုစီကိုဖြေဆိုရာတွင် စာကြောင်းတစ်ကြောင်းဖြင့် ပြည့်စုံစွာဖြေဆိုရပါမည်။
Fill in each numbered blank with a word from the list given. There are five extra words. (10 marks)
Write down only the number of the blank and the word that fills it.
ကွက်လပ် (၂၀)ပါသောပြဌာန်းစာအုပ်ပါ စာပိုဒ် (၁)ပိုဒ်ပေးထားပြီးဖြည့်ရမည့် စကားလုံး (၂၅)လုံးပေးထားပါမည်။ မှန်ကန်သောစကားလုံး (၂၀)ဖြင့် ကွက်လပ်ကိုဖြည့်ပေးရပါမည်။
III.(A) Choose the appropriate word(s)to complete the sentences. (5 marks)
ပြဌာန်းစာအုပ်ရှိ Vocabulary Section နှင့် စာပိုဒ်များတွင် ပါဝင်သောစကားလုံးများဖြင့် တည်ဆောက်ထားသောဝါကျ (၅)ကြောင်းပေးထားပါမည်။ဝါကျတစ်ကြောင်းစီတွင် ရွေးချယ်စရာ (၃)ခုကို A, B, C ဖြင့်ပေးထားပြီးဝါကျကိုအဓိပ္ပါယ်ပြည့်စုံစေသည့်မှန်ကန်သောစကားလုံး(သို့မဟုတ်) စကားစုကိုရွေးချယ်ပေးရပါမည်။
III.(B)Write the appropriate words or groups of words to complete the lines of verse. (5 marks)
ပြဌာန်းစာအုပ်ရှိကဗျာများထဲမှကွက်လပ်(၁)ခုစီပါဝင်သောမေးခွန်း(၅)ခုမေးပါမည်။ကဗျာစာကြောင်းများကိုပြည့်စုံအောင် မှန်ကန်သောစကားလုံးများဖြင့်ဖြည့်ပေးရပါမည်။
Give complete answers to these questions. (10 marks)
ပြဌာန်းစာအုပ်ပါ သင်ခန်းစာ(၁၄)ခုတွင်ပါရှိသောစာပိုဒ်များအပေါ် အခြေခံ၍ မေးခွန်း(၄)ပုဒ်ကိုမေးပါမည်။မေးခွန်းနံပါတ်(၅)တွင် ကဗျာများမှ ကောက်နုတ်ထားသောစာကြောင်း (၂)ကြောင်း၊ (၃)ကြောင်းပေးထားပြီးWhat do these lines mean?ဟုမေးပါမည်။ ကဗျာ၏ ဆိုလိုရင်းကိုတိကျမှန်ကန်စွာဖြေဆိုရပါမည်။
Read the passage.
ပြဌာန်းစာအုပ်တွင် မပါဝင်သောတက္ကသိုလ်ဝင်ကျောင်းသား၊ ကျောင်းသူတို့အဆင့်နှင့် ကိုက်ညီသည့် စာပိုဒ် တစ်ပိုဒ် ပေးထားပါမည်။
Answer these questions. Give complete answers. (10 marks)
မေးခွန်း(၅)ခုမေးပါမည်။ စာပိုဒ်ကိုဖတ်ပြီးမေးခွန်းများကိုပြည့်စုံစွာဖြေဆိုရပါမည်။
Punctuate the following. (5 marks)
ပြဌာန်းစာအုပ်တွင် မပါသောစာကြောင်း(၅)ကြောင်းပေးထားပြီး ၎င်းစာကြောင်းများကို သင့်လျော်သော Punctuation Markများသုံး၍ ပြန်ရေးပေးရပါမည်။
VII.(A) Finish each sentence in such a way that it means exactly the same as the sentence that is given. (10 marks)
ဝါကျ(၁၀)ကြောင်းပေးထားပြီး ၎င်းဝါကျများကို အဓိပ္ပါယ်မပြောင်းစေပဲပေးထားသောဝါကျအစစကားလုံးများဖြင့် ပြည့်စုံစွာပြန်လည် ရေးသားဖြေဆိုရပါမည်။
Using the prompts given, write a very short paragraph on ONE of the following. (10 marks)ဖတ်စာအုပ်ပါ သင်ခန်းစာများကိုအခြေခံသောခေါင်းစဉ်(၂)ခုပေးထားပါမည်။ မိမိနှစ်သက်ရာခေါင်းစဉ်တစ်ခုကိုရွေးချယ်၍ ပေးထားသောအချက်အလက်များကိုအသုံးပြု၍ စာပိုဒ် တစ်ပိုဒ်ရေးသားရပါမည်။
VIII. Letter Writing (10 marks)
ရွေးချယ်ရန် ပေးစာ (၂)ခုပေးထားပါမည်။မိမိနှစ်သက်ရာပေးစာတစ်စောင်ကိုရွေး၍ စာလုံးရေ (၃၀၀) ထက်မပို သောပေးစာတစ်စောင်ရေးသားရပါမည်။
Essay Writing (15 marks)
ရွေးချယ်ရန် စာစီစာကုံးခေါင်းစဉ် (၃)ခုပေးထားပါမည်။ မိမိနှစ်သက်ရာတစ်ခုကိုရွေး၍ စာလုံးရေ (၅၀၀) ထက်မပိုသောစာစီစာကုံးတစ်ပုဒ် ရေးသားရပါမည်။
