ပြည်ထောင်စုငြိမ်းချမ်းရေးညီလာခံ- ၂၁ ရာစု ပင်လုံ နောက်ဆုံးနေ့၌
ပြည်ထောင်စုငြိမ်းချမ်းရေးညီလာခံ -(၂၁) ရာစုပင်လုံ ကျင်းပရေးဗဟိုကော်မတီ ဥက္ကဌ နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ပြောကြားသည့် ကျေးဇူးတင် အမှာစကား
ပြည်ထောင်စုငြိမ်းချမ်းရေးညီလာခံ -(၂၁) ရာစုပင်လုံ ကျင်းပရေးဗဟိုကော်မတီ ဥက္ကဌ နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ပြောကြားသည့် ကျေးဇူးတင် အမှာစကား
ကျွန်မတို့ ဒီညီလာခံကြီးဟာ ငြိမ်းချမ်းရေးဖြစ်စဉ်ရဲ့ တစိတ်တပိုင်းဖြစ်ပါတယ်။ ဖြစ်စဉ်တစ်ခုဆိုတာ အစဉ်တစိုက် လုပ်နေဖို့အရာဖြစ်ပါတယ်။ ကျွန်မတို့ဟာ ဒီညီလာခံထဲမှာ ရောက်နေတဲ့ အချိန်မှာပဲ ငြိမ်းချမ်းရေးကိစ္စ စဉ်းစားဖို့မဟုတ်ပါဘူး။ အစည်းအဝေးတွေ ကျင်းပနေချိန်မှသာ ငြိမ်းချမ်းရေးကို စဉ်းစားနေဖို့ မဟုတ်ပါဘူး။
တချိန်လုံး ကျွန်မတို့ဟာ ငြိမ်းချမ်းရေးကို ဘယ်လိုရအောင်ယူကြမလဲ ကျွန်မတို့ရဲ့ ပြည်ထောင်စုကြီး ခိုင်ခံအောင် ချမ်းသာအောင်လို့ဘယ်လို လုပ်ကြမလဲဆိုတာ အစဉ်တစိုက် ကျွန်မတို့ စဉ်းစားနေကြရမယ့် ကိစ္စဖြစ်ပါတယ်။ အခု ဒီညီလာခံကြီးအတွင်းမှာ ဆွေးနွေးခဲ့တဲ့ အရာအားလုံးကို ပြည်သူလူထု သိနိုင်အောင်လို့ ကျွန်မတို့ လွှင့်ပေးပါတယ်။ ဒီလိုလွှင့်ပေးခြင်းအားဖြင့် ပြည်သူလူထုဟာ ကျွန်မတို့ရဲ့ ငြိမ်းချမ်းရေး ညီလာခံထဲမှာ မဖြစ်မနေပါဝင်ရမယ့်ပုဂ္ဂိုလ်များဖြစ်တယ် ဆိုတာကို နားလည်စေချင်တယ်။
ပြည်သူများအနေနဲ့ ကျွန်မတို့ငြိမ်းချမ်းရေးရဖို့ ဘယ်လိုအခက်အခဲတွေ ကျော်လွှားဖို့ လိုမလဲဆိုိတာကို နားလည်စေချင်တယ်။ အခက်အခဲတွေရှိတယ် ဆိုတာသိမှ ဒီအခက်အခဲတွေကို ဘယ်လိုကျော်လွှား ရမလဲဆိုတဲ့ အဖြေကို ကျွန်မတို့ ရှာနိုင်မှာဖြစ်ပါတယ်။
အခုဆိုရင် အစုအဖွဲ့ အသီးသီး ပုဂ္ဂိုလ်များအရ အစုအဖွဲ့များအရ ပြောသွားတဲ့နေရာမှာ ဘယ်သူတွေဟာ အတိတ်ကို ပိုပြီးလှည့်ကြည့်တဲ့နေရာမှာ အားသန်သလဲ ဘယ်သူတွေဟာ အနာဂတ်ကို မျက်နှာမူတဲ့ နေရာမှာ အားသန်သလဲ ဆိုတာလည်း ပေါ်လာပါလိမ့်မယ်။ ဒါပေမယ့်လည်း ဒါတွေက ထာဝရ မဟုတ်ပါဘူး။
အခုချိန်မှာ အတိတ်ကို လှည့်ကြည့်နေတဲ့ ပုဂ္ဂိုလ်များဟာ နောင်တချိန်မှာ အနာဂတ်ဘက်ကို လှည့်သွားတာလဲ ဖြစ်နိုင်ပါတယ်။ ဖြစ်ဖို့လည်း ကျွန်မတို့ မျှော်လင့်ပါတယ်။ အတိတ်ရဲ့ ချည်နှောင်မှုကို ကျွန်မတို့က ခံနေမှာလား။ အနာဂတ်ကိုသတ္တိရှိရှိနဲ့ ရင်ဆိုင်ပြီးတော့ တည်ဆောက်သွားမှာလား ဆိုတာကို ကျွန်မတို့ တစ်ဦးချင်းတစ်ဦးချင်း ဆုံးဖြတ်ရမယ့်ကိစ္စဖြစ်ပါတယ်။
ဒီဆုံးဖြတ်ချက်ဟာ အစုအဖွဲ့တစ်ခုအတွက်လည်း မဟုတ်ပါဘူး။ ပုဂ္ဂိုလ်တစ်ဦး တစ်ယောက်တည်း အတွက်လည်း မဟုတ်ပါဘူး။ တိုင်းရင်းသားလူမျိုးစု တစ်ခုအတွက်လည်း မဟုတ်ပါဘူး။ ကျွန်မတို့ ပြည်ထောင်စုကြီး အတွက် ဖြစ်တယ်ဆိုတာကို ကျွန်မတို့ သဘောပေါက်ဖို့လိုပါတယ်။
ပြည်ထောင်စုကြီး ငြိမ်းချမ်းရေးဆိုတာ ကမ္ဘာ့ငြိမ်းချမ်းရေးနဲ့လည်း သက်ဆိုင်နေပါတယ်။ ဒါကြောင့်မို့ ဒီခန်းမထဲက ဖြစ်စဉ်ကို တကမ္ဘာလုံးကလည်း စိတ်ဝင်စား ကြပါတယ်။
ဒီလိုငြိမ်းချမ်းရေး ရယူဖို့ဆိုတာအင်မတန်မှ ခက်ခဲတဲ့ကိစ္စပါ။ အခြားနိုင်ငံတွေမှာလဲ အခက်အခဲတွေ ကျော်လွှားပြီး ငြိမ်းချမ်းရေးရယူကြတယ်။ အဲလိုရယူတဲ့အချိန်မှာဆိုရင် မုဒိတာပွားကြတယ်။ စိတ်ချမ်းသာ ကြတယ်။ ဘာဖြစ်လို့လဲဆိုတော့ လူသား တွေထဲမှာဆိုရင် အချင်းချင်းဆက်နွယ်မှုဆိုတာရှိတယ်။
တနေရာမှာ ငြိမ်းချမ်းရေးရသွားပြီဆိုရင် ကျွန်မတို့ နိုင်ငံအတွက် မျှော်လင့်ချက် ရသလို ကျွန်မတို့ နိုင်ငံမှာ ငြိမ်းချမ်းရေးအောင်မြင်မယ်ဆိုရင် တခြားနိုင်ငံတွေ အတွက်လဲ မျှော်လင့်ချက်ပေးရာရောက်ပါတယ်။
ဒါကြောင့်ကျွန်မတို့အားလုံး ကိုယ့်တာဝန်ဟာ ဘယ်လောက်ကြီးမားတယ်။ ဒီတာဝန်ကို ကျေကျေပွန်ပွန် ထမ်းဆောင်နိုင်ဖို့ အခွင့်အရေးဟာဘယ်လောက် ဂုဏ်သိက္ခာရှိတယ်ဆိုတာမေ့လို့မဖြစ်ပါဘူး။ အခု ဆိုလို့ရှိရင် ဒီညီလာခံဟာ ညီလာခံရဲ့နိဒါန်းပဲဖြစ်ပါ တယ်။ ပထမအစည်းအဝေးပါ။ ပထမ အစည်းအဝေး ပြီးရင် နောက်လည်း အစည်းအဝေးတွေလည်း လာဦးမှာပါ။ ကြားထဲမှာ လုပ်စရာတွေအများကြီးရှိပါတယ်။
အမျိုးသားအဆင့်ဆွေးနွေးပွဲများလုပ်ဖို့ဆိုတာဟာ ဒီညီလာခံပြီးတာနဲ့ အစည်းအဝေး ပြီးတာနဲ့ စတင်ပြီး ပြင်ဆင်ရတော့မှာ ဖြစ်ပါတယ်။ ကျွန်မတို့ရဲ့ CSO ဖိုရမ်တွေဖြစ်မြောက်ဖို့ စတင်ပြင်ဆင်ရတော့မှာ ဖြစ်ပါတယ်။ လုပ်စရာ အလုပ်တွေက အများကြီးပါပဲ။ဒါပေမယ့်လုပ်ရကျိုးနပ်ပါတယ်။ ဘာဖြစ်လို့လဲ ဆိုတော့ ကျွန်မတို့လုပ်နေတာက နိုင်ငံရဲ့အနာဂတ်အတွက် လုပ်နေတာဖြစ်ပါတယ်။ နိုင်ငံရဲ့ အနာဂတ် ဆိုတာဟာ အင်မတန်မှကြာရှည်တဲ့ ကာလကြီးပါ။ နိုင်ငံရဲ့ အနာဂတ်မှာဒီနိုင်ငံရဲ့ အရိပ်ကိုခိုလုံ သွားရမယ့် ပြည်သူ ပြည်သားများ ဆိုတာလည်းမရေမတွက်နိုင် အောင်ရှိပါလိမ့်မယ်။ ဒီကမ္ဘာကြီး ဘယ်လောက် ကြာကြာခံ နိုင်မလဲဆိုတာက ကျွန်မတို့တယောက်မှမသိပါဘူး။ ကမ္ဘာတည်သရွေ့ ကျွန်မတို့ မှီတင်း နေထိုင်သူများ အားလုံး လုံခြုံဖို့အတွက်ကိုယ်စိတ် နှစ်ဖြာချမ်းသာဖို့အတွက် ကျွန်မတို့ လုပ်နိုင်မယ် ဆိုလို့ရှိရင် ဒါဟာ ကျွန်မတို့လူဖြစ်ရကျိုးနပ်ပြီလို့ အားလုံးကပြောနိုင်ပြီဖြစ်ပါတယ်။
ဒါကြောင့်မို့ ကျွန်မတို့ညီလာခံကို တတ်ရောက်လာတဲ့ ကိုယ်စားလှယ်များ အားလုံး ဒီညီလာခံရဲ့ အောင်မြင်မှုမှာ ပါဝင်ရမယ့်ကိုယ်စားလှယ် အားလုံးဟာ လူဖြစ်ရကျိုးနပ်အောင်ကြိုးစားကြပါလို့ ကျွန်မ တိုက်တွန်းချင်ပါတယ်။ ကျွန်မတို့ဟာ ဒီလောကကြီး လာသွားရတာဟာ တစ်ခဏလေးပါ။ ကျွန်မတို့ အသက် ဘယ်လောက်ရှည် နိုင်မလဲ။ ကျွန်မသိသလောက် ကမ္ဘာဆုံးအသက်အရှည်ဆုံး ပုဂ္ဂိုလ်ဟာ ၁၂၀ လောက် ဖြစ်ပါတယ်။ ၁၂၀ ဆိုတာ ဘာမှမဟုတ်ပါဘူး။
နိုင်ငံတစ်နိုင်ငံရဲ့ သက်တမ်းနဲ့ စာလို့ရှိရင် ကမ္ဘာကြီးရဲ့ သက်တမ်းနဲ့စာလို့ရှိရင် ၁၂၀ ဆိုတာ ဘာမှ မဟုတ်ပါဘူး။ ကျွန်မတို့တွေ ကံကောင်းလို့ ကျန်းမာရေးကောင်းလို့ ၁၂၀ ထိနေနိုင်တယ်ပဲ ဆိုပါဦးစို့ ဒီ ၁၂၀ ဆိုတာ တခဏလေးပါပဲ။ ကျွန်မတို့လို အသက်ရောက်နေတဲ့သူတွေဆိုရင် ၁၂၀ ထိနေဖို့ဆိုတာ သိပ်တော့ မကျန်တော့ပါဘူး။ ဒီတော့ ကျွန်မတို့ဟာ ကိုယ်ရှိတဲ့ အချိန်လေးကို တန်ဖိုးရှိအောင် သုံးကျပါစို့ ကိုယ်ရှိတဲ့ အချိန်လေးကို အရင်တုန်းကဖြစ်ခဲ့တဲ့ကိစ္စတွေကို ပြန်လှည့်ကြည့်ပြီး အာဃာတတွေ ပွားနေမယ့် အစား တစ်ဦးပေါ်တစ်ဦး သံသယတွေပွားနေမယ့်အစား ကျန်တဲ့အချိန်အတွင်းမှ ဘယ်လို အာဃာတတွေ ပျောက်အောင် လုပ်မလဲ။
ဘယ်လိုဒီသံသယတွေ ကင်းစင်အောင်လုပ်မလဲ။ ဘယ်လိုကောင်းမွန်တဲ့ အမွေအနှစ်တစ်ခုကို ချန်ထား ခဲ့မလဲ ဆိုိတာကို စဉ်းစားကြပါစို့လို့ ကျွန်မကနေပြီး တော့တိုက်တွန်းချင်ပါတယ်။ အခု ကျွန်မတို့ ညီလာခံ အတွင်းမှာ တစ်ခါတလေ အထစ်အငေါ့လေးတွေဖြစ်တယ် မပြေလည်တဲ့ကိစ္စတွေ ရှိပေမယ် ဒီညီလာခံ ဖြစ်မြောက်အောင်လို့ လုပ်ပေးတဲ့ပုဂ္ဂိုလ်တွေအားလုံးကို ကျွန်မလှိုက်လှိုက်လှဲလှဲ ကျေးဇူးတင် ပါတယ်။
ဒီညီလာခံ လုပ်ဖို့အချိန်လည်း သိပ်ရှိခဲ့တာ မဟုတ်ဘူး။ အချိန်သိပ်ရှိခဲ့တာ မဟုတ်ဒါဆို အချို့က မေးမယ်။ ဘာလို့မြန်မြန်လုပ်လဲ ဘာလို့မစောင့်လဲဆိုရင် ဒါက စောင့်ရမယ့် ကိစ္စလည်းမဟုတ်ဘူး။ ကျွန်မတို့မှာ ရှိတဲ့ အချိန်ကို လုပြီး လုပ်နေရတာပါ။ ရှိတဲ့အချိန်က လုပြီးလုပ်တယ် ဆိုတာက ကျွန်မတို့အတွက်လည်း မဟုတ်ဘူး။ ကျွန်မတို့ အစိုးရအတွက် လည်းမဟုတ်ဘူး။
ကျွန်မတို့ အစိုးရဖြစ်ဖြစ် ဘယ်အဖွဲ့အစည်းဖြစ်ဖြစ် ပြည်သူလူထုရဲ့ ထောက်ခံမှုမရှိရင် ဘယ်ကိစ္စကိုမှ အောင်မြင်အောင် လုပ်နိုင်မှာမဟုတ်ပါဘူး။ ဒါကြောင့် ကျွန်မတို့က ပြည်သူလူထုရဲ့ ယုံကြည်မှု ထောက်ခံမှု ပြည်သူလူထုရဲ့ လေးစားမှုရအောင်လို့ ညီလာခံကြီး ဖြစ်မြောက်အောင် အားလုံးကြိုးစား ၀ိုင်းလုပ်ဖို့ လိုပါတယ်။ ပြည်သူတွေက ကြည့်နေကြပါတယ်။ ပြည်သူတွေက နားထောင်နေကြပါတယ်။ ပြည်သူတွေက မျှော်လင့်နေကြပါတယ်။ ပြည်သူတွေက သုံးသပ်နေကြပါတယ်။
ဘယ်သူတွေဟာ ဘယ်လိုစိတ်ထားရှိတယ်။ ဘယ်လို ပြသာနာတွေ ကျွန်မတွေ အားလုံးကျော်လွှားရမယ်။ ဘယ်သူတွေက ကျွန်မတို့နိုင်ငံအတွက် အဓိကစေတနာထားပြီး ကြိုးစားမယ်ဆိုတာကို ပြည်သူတွေက ဆုံးဖြတ်မှာပါ။ ကျွန်မတို့ဆုံးဖြတ်လို့ ရတာမဟုတ်ဘူး။
လူတစ်ဦးရဲ့တန်ဖိုးဆိုတာ တနေ့တနေ့ ပြောင်းနေပါတယ်။ ဘာလို့လဲဆိုတော့ နေ့တိုင်းနေ့တိုင်းက အခွင့်အရေးသစ်ပါ။ တနေ့နေ့မိုးလင်းလာတာနဲ့ကိုယ့်မှာ အခွင့်အရေး သစ်တွေရလာတာပါ။
ဒီအခွင့်အရေးသစ်တွေကို ထိုက်ထိုက်တန်တန် သုံးကြပါလို့ တိုက်တွန်းချင်ပါတယ်။ ဒီအခွင့်အရေးသစ် တွေကို ထိုက်ထိုက်တန်တန်သုံးခြင်းအားဖြင့်ကျွန်မတို့ လိုချင်တဲ့ ပန်းတိုင်ကိုရောက်မှာပါ။
အခုပြောသွားတဲ့ ပွင့်ပွင့်လင်းလင်း ဝေဖန်တာတို့ တိုက်ခိုက်တာတို့လည်း ပါသွားပါတယ်။ ဒီကိုယ်စားလှယ် တွေ ထဲမှာ ကျွန်မကလည်းဒီလိုဖြစ်တာဟာ ဘာမှကြောက် စရာမရှိဘူးလို့ ကျွန်မဒီလိုပဲယုံကြည်ပါတယ်။ စိုးရိမ်စရာမရှိဘူး။ ပြဿနာကို စိုးရိမ်စရာမရှိပါဘူး။ ပြဿနာမရှိချင်ယောင်ဆောင်နေရတာဟာ ဒါကသာ စိုးရိမ်စရာ ဖြစ်ပါတယ်။ ပြသာနာ မရှိချင်ယောင်ဆောင်နေရင် ပြသာနာတွေဖြေရှင်းနိုင်မှာ မဟုတ်ပါဘူး။
ဒါကြောင့် သတ္တိရှိရှိနဲ့ ဒီပြသနာတွေကို ရင်ဆိုင်မယ်ဖြေရှင်းနိုင်တဲ့ အရည်အချင်းတွေ မွေးထုတ်မယ်။ တစ်ဦးကိုတစ်ဦး ကူညီမယ်ဖေးမမယ်။ တစ်ဦးရဲ့အမြင်တစ်ဦးက လေးစားမယ် နားထောင်မယ်။ သဘောထားချင်း မတိုက်ဆိုင်ရင်တောင် ဘာကြောင့် မတိုက်ဆိုင်တဲ့ သဘောထားတွေ ရှိနေလဲဆိုတာ စဉ်းစားရမယ်။ ဒါမှကျွန်မတို့ အားလုံးညီညီညွတ်ညွတ်နဲ့ လိုချင်တဲ့ ငြိမ်းချမ်းရေးပန်းတိုင်ကို ရောက်နိုင်မှာ ဖြစ်ပါတယ်။
ကျွန်မ ဒီညီလာခံကြီးကို နေ့တိုင်းမတတ်ဖြစ်ဘူး။ ဒါပေမယ့် ကျွန်မဒီဖြစ်စဉ်ကြီးကို အင်မတန်မှ အလေးထားပါတယ်။ ကျွန်မတို့ အစိုးရက အဓိက အင်အားက ပြည်သူတွေ လက်ထဲမှာရှိတယ် ဆိုတဲ့ မူကို အလေးထားပါတယ်။ အစိုးရအဖွဲ့ဆိုတာ ပြည်သူလူထုရဲ့ သဘောထားတွေကို လိုက်နာဖို့နဲ့ အလေးထားဖို့က အရေးကြီးပါတယ်။
ကျွန်မတို့ဟာ အစိုးရကောင်းတစ်ခု ဖြစ်အောင်ကြိုးစားနေပါတယ်။ ၂၁ပင်လုံဟာ ၁၉၄၇ ခုနှစ် ကျင်းပခဲ့တဲ့ ပင်လုံလိုပဲ ကျွန်မတို့ နိုင်ငံသမိုင်းမှာ ဂုဏ်ယူစရာဝင့်ကြွားစရာ အားတတ်စရာ အခမ်းအနားကြီး အခင်းအကျင်းကြီး တစ်ခုဖြစ်စဉ်ကြီး တစ်ခုဖြစ်ဖို့ ၀ိုင်းဝန်းကြိုးစားကြပါလို့ ပြောရင်း နိဂုံးချုပ်ပါတယ်။
Source: https://www.facebook.com/state.counsellor/posts/869936426473908
No comments:
Post a Comment